बराहक्षेत्रमा मानसिक समस्या भएकी महिला कोशी नदीबाट सकुशल उद्धार
सुनसरी, जेठ १२ – सुनसरीको बराहक्षेत्र नगरपालिका वडा नम्बर ९ हिडुलुवा बस्ने अन्दाजी ५० वर्षीया सज्जा कबिरथलाई कोशी नदीको टापुबाट सकुशल उद्धार गरिएको छ।
मानसिक सन्तुलन ठीक नभएकी कबिरथलाई बिहान करिब १०:३५ बजे आफ्नै घरमा घुर ताप्ने क्रममा अचानक आगोले डामेपछि डरले उनी घरबाट निस्किएर ऐ.ऐ. राजाबासस्थित कोशी नदीको बाँध नजिक पुगेकी थिइन्। त्यहाँबाट उनले नदीमा हाम फालेर बीचको टापुमा पुगेकी थिइन्।
उक्त अवस्थामा कराउँदै र चिच्याउँदै गरेकी उनलाई स्थानीयले देखेपछि तत्काल इलाका प्रहरी कार्यालय महेन्द्रनगर, सुनसरीलाई खबर गरिएको थियो। खबर प्राप्त हुनासाथ प्रहरी नायव निरीक्षक कृष्ण आचार्यको कमाण्डमा प्रहरी टोली घटनास्थल पुग्यो।
प्रहरीले स्थानीय नाउवालहरूको सहयोगमा उनलाई सकुशल उद्धार गरी तत्काल उपचारका लागि नगर अस्पताल महेन्द्रनगर, चक्रघट्टीतर्फ पठाइएको इलाका प्रहरी कार्यालयले जनाएको छ।
