बराहक्षेत्रमा लागू औषधसहित दुई युवा नियन्त्रणमा

बराहक्षेत्रमा लागू औषधसहित दुई युवा नियन्त्रणमा

सुनसरी, २०८२ जेठ १४ – सुनसरीको बराहक्षेत्र नगरपालिका–५ स्थित कालाबन्जार पेट्रोलपम्प नजिकै प्रहरीले प्रतिबन्धित लागू औषधसहित दुई युवालाई नियन्त्रणमा लिएको छ।

बुधबार साँझ ५:३० बजे  प्रहरी चौकी भरौलबाट प्रहरी सहायक निरीक्षक डम्बर गौतमको नेतृत्वमा र ट्राफिक पोस्ट नडाहाबाट प्रहरी सहायक हवल्दार टंकराज गिरीसहित खटिएको संयुक्त चेकजाँच टोलीले को २ ह ३२०२ नम्बरको यात्रुवाहक अटो रोकी चेकजाँच गर्दा उक्त लागू औषध फेला परेको हो।

अटोमा सवार व्यक्तिहरू भाग्न खोजेपछि तत्काल नियन्त्रणमा लिइएको प्रहरीले जनाएको छ। पक्राउ परेका व्यक्तिहरूमा जिल्ला भोजपुर, हतुवागढी गाउँपालिका–१, फलाटे निवासी १८ वर्षीय हेमराज सुवेदी र सुनसरी बराहक्षेत्र नगरपालिका–२ निवासी २० वर्षीय अनुज बस्नेत रहेका छन्।

प्रहरीका अनुसार हेमराज सुवेदीले बोकेको सानो साइड ब्यागबाट निम्न सामग्रीहरू बरामद गरिएको छ:

ट्रामाडोल हाइड्रोक्लोराइड (Tramadol Hydrochloride) क्याप्सुल: १७ पत्ता बन्द (१७० पिस) र ५ पिस खुल्ला गरी जम्मा १७५ पिस

एन्टी–कफ (Anti-Kof) ट्याब्लेट: १६ पत्ता बन्द (१६० पिस) र ५ पिस खुल्ला गरी जम्मा १६५ पिस

उक्त लागू औषधहरू बिना चिकित्सकको सिफारिस बिक्री, वितरण तथा उपभोग गर्न कानुनी रूपमा निषेधित रहेको छ। दुबै युवकलाई नियन्त्रणमा लिएर लागू औषध सम्बन्धी मुद्दामा अनुसन्धान अगाडि बढाइएको प्रहरी चौकी भरौलले जानकारी दिएको छ।