बराहक्षेत्रमा ७८ केजी गाँजा सहित तीन जना र मोटरसाइकल नियन्त्रणमा
बराहक्षेत्र, सुनसरी — जिल्ला प्रहरी कार्यालय सुनसरीअन्तर्गत प्रहरी चौकी मधुवन र इलाका प्रहरी कार्यालय महेन्द्रनगरबाट खटिएको संयुक्त टोलीले बराहक्षेत्र नगरपालिका–११ मधुवनमा लागू औषध गाँजा ७८ केजीसहित तीन जना र एक मोटरसाइकल नियन्त्रणमा लिएको छ।
प्रहरीका अनुसार २०८२ साउन २५ गते दिउँसो ४ः१० बजे विशेष सूचनाको आधारमा बराहक्षेत्र–११ मधुवनस्थित ऐ.ऐ. बस्ने वर्ष ५० का मुस्ताक मियाको टिनको छानो र बाँसको बेराले घेरिएको घरमा कानुन बमोजिम खानतलासी गर्दा घरभित्र लुकाइ–छिपाइ राखिएको अवस्थामा ३ वटा प्लास्टिकका पोका भित्र गाँजा जस्तो देखिने ७८ किलोग्राम पदार्थ फेला परेको हो।
उक्त गाँजासहित घरधनी मुस्ताक मिया, ओसार–पसारमा संलग्न बराहक्षेत्र–६ बस्ने बलराम यादव र ऐ.ऐ.स्थित पटेरको घारीमा लुकाएर राखिएको BR 10 AQ 55427 नम्बरको भारतीय मोटरसाइकलसमेत नियन्त्रणमा लिइएको प्रहरीले जनाएको छ।
नियन्त्रणमा लिइएका व्यक्ति, गाँजा र मोटरसाइकलसहित इलाका प्रहरी कार्यालय महेन्द्रनगरमा ल्याई थप अनुसन्धान भइरहेको छ।
