बराहक्षेत्र, सुनसरी — बराहक्षेत्र नगरपालिका–६ चक्रघट्टीस्थित बराहक्षेत्र नगर अस्पतालअन्तर्गत सञ्चालित आँखा उपचार केन्द्रमा बिहीबार दोस्रो पटक मोतियाबिन्दुको शल्यक्रिया (अप्रेशन) सेवा सुरु गरिएको छ।
नगर अस्पतालका निमित्त व्यवस्थापक दिवस विष्टका अनुसार, बिहीबार आयोजित अप्रेसन कार्यक्रममा एकैदिन ५४ जनाले मोतियाबिन्दुको निशुल्क शल्यक्रिया सेवा प्राप्त गरेका छन्।
बराहक्षेत्र नगरपालिकाको सहकार्य तथा समन्वयमा, तिलगंगा आँखा प्रतिष्ठान काठमाडौं र रामलाल गोल्छा आँखा अस्पतालको प्राविधिक सहयोगमा आँखा उपचार केन्द्र स्थापना गरिएको हो। नगर प्रमुख रमेश कार्कीका अनुसार, आर्थिक रूपमा विपन्न तथा अस्पतालसम्म पुग्न कठिनाई हुने ग्रामीण बासिन्दाहरूलाई लक्षित गर्दै निशुल्क आँखा परीक्षण शिविर सञ्चालन गर्ने र त्यही क्रममा मोतियाबिन्दुको निशुल्क अप्रेसन गर्ने उद्देश्यले यो सेवा सुरु गरिएको हो।
मोतियाबिन्दुसहित अन्य आँखासम्बन्धी रोगको उपचारका लागि यो केन्द्रमा नियमित रूपमा निशुल्क शिविर सञ्चालन गरिने नगरपालिकाले जनाएको छ।
