सुनसरी । नेपाल सरकारको सङ्घीय मामिला तथा सामान्य प्रशासन मन्त्रालयले आर्थिक वर्ष २०८०/८१ का लागि गरेको स्थानिय तह संस्थागत क्षमता स्वमूल्याङ्कन (लिसा) मा बराहक्षेत्र नगरपालिका सुनसरीकै उत्कृष्ट स्थानीय तहको रूपमा चयन भएको छ।
सुनसरी जिल्लाकै कान्छो नगरपालिका बराहक्षेत्रले लगातार तेस्रो वर्ष पनि जिल्लामा पहिलो स्थान हासिल गरेको हो। यसपालि बराहक्षेत्रले १०० पूर्णाङ्कमध्ये ८५.७५ अंक प्राप्त गरेको प्रमुख प्रशासकीय अधिकृत गणेश बहादुर कटुवालले जानकारी दिए।
बराहक्षेत्रले जिल्लाका अन्य उपमहानगरपालिका, नगरपालिका र गाउँपालिकालाई पछि पार्दै उत्कृष्ट अंक ल्याएको हो। यस उपलब्धीसँगै बराहक्षेत्र नगरपालिका कोशी प्रदेशका १३६ स्थानीय तहमध्ये पाँचौँ स्थानमा पर्न सफल भएको छ।
प्रदेशस्तरमा इलामको सूर्यदय नगरपालिका ९०.५० अंकसहित पहिलो, इलाम नगरपालिका ९० अंकसहित दोस्रो, विराटनगर महानगरपालिका ८७.२५ अंकसहित तेस्रो, खोटाङको हलेसी तुवाचुङ नगरपालिका ८६.५० अंकसहित चौथो र झापाको कन्काई नगरपालिका ८६ अंकसहित पाँचौँ उत्कृष्ट स्थानीय तह बनेका छन्।
सुनसरीका अन्य स्थानीय तहहरूले पाएको अंक यसप्रकार छः
भोक्राह गाउँपालिका — ८०.५०
दुहवी नगरपालिका — ८०.२५
इटहरी उपमहानगरपालिका — ८०
धरान उपमहानगरपालिका — ७७.५०
हरिनगरा गाउँपालिका — ७३
इनरुवा नगरपालिका — ७१.२५
गढी गाउँपालिका — ७१
बर्जु गाउँपालिका — ६८.५०
कोशी गाउँपालिका — ६४
देवाङ्ज गाउँपालिका — ५६
रामधुनी नगरपालिका — ५३.५०
संघीय सरकारले आगामी आर्थिक वर्षको बजेट विनियोजनका क्रममा स्थानीय तहलाई शसर्त र निःशर्त अनुदान वितरण गर्न आधार मान्ने यो मूल्याङ्कनमा बराहक्षेत्र नगरपालिकाले लगातार उत्कृष्ट अंक ल्याउँदै आएको छ।
नगरपालिकाले कार्यसम्पादनका १० वटा सूचक क्षेत्रमा उल्लेखनीय प्रगति हासिल गर्दै जिल्लामा मात्र नभई प्रदेशस्तरमै अग्रस्थानमा आफ्नो उपस्थितिलाई मजबुत बनाएको छ।
