जिल्ला स्तरीय लोकनृत्य प्रतियोगितामा हिमशिखर प्रथम, बराह राइजिङ दोस्र
वराह दर्पण/नडाहा
सुनसरी प्याब्सनद्वारा आयोजित जिल्ला स्तरीय लोकनृत्य प्रतियोगितामा माध्यमिक तहअन्तर्गत हिमशिखर इङ्लिस स्कुल, तरहराले प्रथम स्थान हासिल गरेको छ।
माध्यमिक तह र कक्षा १२ (+२) तह छुट्टाछुट्टै रूपमा सञ्चालन गरिएको प्रतियोगितामा +२ तहतर्फ सुनसरी किस्टल एकेडेमी प्रथम र नवयुग बोर्डिङ स्कुल दोस्रो भएको छ। +२ तहतर्फ दुई वटा विद्यालयले प्रतियोगितामा सहभागिता जनाएका थिए।
माध्यमिक तहतर्फ भने सुनसरीका विभिन्न स्थानीय तहबाट छनोट भई आएका १३ वटा विद्यालय सहभागी भएका थिए। जसमा हिमशिखर इङ्लिस स्कुल, इटहरी प्रथम हुँदा बराह राइजिङ स्टार इङ्लिस स्कुल, बराहक्षेत्र–२ चतराले दोस्रो स्थान हासिल गरेको हो। त्यस्तै, खनार सन साइन इङ्लिस स्कुल तेस्रो तथा इटहरीस्थित मकालु इङ्लिस बोर्डिङ स्कुलले सान्त्वना पुरस्कार प्राप्त गरेको छ।
माध्यमिक तहतर्फ प्रथम हुने विद्यालयले चाँदीको रनिङ शिल, मेडल र प्रमाणपत्र प्राप्त गरेको छ भने अन्य विजेता विद्यालयहरूले ट्रफी, मेडल तथा प्रमाणपत्र प्राप्त गरेका छन्। उक्त जानकारी प्याब्सन सुनसरीका अध्यक्ष थानेश्वर ढकालले दिनुभयो।
प्रतियोगितामा माध्यमिक तहतर्फ विजेता हिमशिखर इङ्लिस स्कुल बराह राइजिङ्ग स्टार इङलिस स्कुल र +२ तहतर्फ विजेता सुनसरी किस्टल एकेडेमी आगामी प्रदेश स्तरीय लोकनृत्य प्रतियोगितामा सहभागी हुनेछन्।
शनिबार इटहरीस्थित लायन्स क्लबको भवनमा सम्पन्न कार्यक्रम प्याब्सन केन्द्रीय उपाध्यक्ष टिकाराम ढकालको प्रमुख आतिथ्यतामा सम्पन्न भएको थियो। कार्यक्रममा कोशी प्रदेश प्याब्सन अध्यक्ष सुमित थापा विशेष अतिथिका रूपमा उपस्थित थिए। कार्यक्रमको सभाध्यक्षता प्याब्सन सुनसरीका अध्यक्ष नेशन थानेश्वर ढकालले गर्नुभएको थियो भने कार्यक्रम सञ्चालन संस्थाका सचिव दीपक कार्कीले पहिलो सत्र र वरिष्ठ उपाध्यक्ष विजय कुमार राईले दोस्रो सत्र सञ्चालन गर्नुभएको थियो।
