नेपाली रुपैयाँसहित भारतीय नागरिक पक्राउ
सुनसरी, वैशाख ३ — सशस्त्र प्रहरी बल नेपालले रानी नाकाबाट ५ लाखभन्दा बढी नेपाली रुपैयाँसहित एक भारतीय नागरिकलाई पक्राउ गरेको छ।
मंगलबार दिउँसो विराटनगर–१५ स्थित रानी नाकामा चेकजाँचका क्रममा भारतबाट नेपालतर्फ आउँदै गरेको BR 38 AN 1438 नम्बरको मोटरसाइकल रोकी जाँच गर्दा उक्त रकम फेला परेको हो।
पक्राउ पर्नेमा भारत बिहार, अररिया जिल्ला जोकिहाटका ३० वर्षीय आदेश कुमार चौधरी रहेका छन्। उनले कपडाभित्र लुकाएर ल्याएको स्रोत नखुलेको नेपाली रुपैयाँ ५,००,१५० बरामद भएको प्रहरीले जनाएको छ।
उनको साथबाट मोटरसाइकल, मोबाइल र घडी समेत नियन्त्रणमा लिइएको छ। पक्राउ परेका चौधरीलाई थप अनुसन्धानका लागि इलाका प्रहरी कार्यालय रानी, मोरङमा बुझाइएको छ।
