सुनसरी, वैशाख ३ — सशस्त्र प्रहरी बल नेपाल नं. १ बराह वाहिनी मुख्यालय सुनसरीले गैँडाको खागजस्तो देखिने शंकास्पद वस्तुसहित चार जनालाई नियन्त्रणमा लिएको छ।
मिति २०८३ वैशाख ३ गते साँझ करिब ७:३० बजे सुनसरीको बर्जु गाउँपालिका–६ स्थित बर्जु तालको पूर्वी गेटबाट करिब १५० मिटर भित्र अवैध कारोबार भइरहेको विशेष सूचनाका आधारमा खटिएको सशस्त्र प्रहरी टोलीले उनीहरूलाई नियन्त्रणमा लिएको हो।
वाहिनीपति सशस्त्र प्रहरी नायव महानिरीक्षक मनिष थापालाई प्राप्त सूचनाका आधारमा सशस्त्र प्रहरी नायव उपरीक्षकको कमाण्डमा १६ जनाको टोली परिचालन गरिएको थियो।
प्रहरीका अनुसार पक्राउ परेकाहरूले मोटरसाइकलमा लुकाई–छिपाई राखी गैँडाको खागजस्तो देखिने वस्तुको मोलमोलाई गरिरहेको अवस्थामा फेला परेका हुन्।
बरामद सामग्रीमा गैँडाको खागजस्तो देखिने वस्तु १ थान र मोटरसाइकल २ वटा रहेका छन्।
पक्राउ परेका चारै जना तथा बरामद सामग्रीलाई आवश्यक कारबाहीका लागि जिल्ला वन कार्यालय, इनरुवा सुनसरीमा बुझाइएको छ। घटनाबारे थप अनुसन्धान भइरहेको छ।
